MAJA STEPANČIĆ
2. alt

Dve, tri od Maje!
Kratko da kraće ne more:
berba – ledena 1976.
dozorela – va Rečkoj gimnazije i študiju psihologije
karakteristike: kolor – zadnjeh 5 let se osim črne
druge karakteristike: lagana ovisnost, naročito postoli
izvrsno se sljubljuje z auti, pasi, Agathun Christie, forenzikun, Bachovun Toccatun i fugun, potresujun, pasijanson
čuvat izvan dohvata oneh ki nisu spravni da njin se vrati milo za drago

• Najdraže putovanje?
  Prvi let z avionon – a i to mi je prnesal kanat va klape. Samo dajte još takoveh gaž! Obožavan brzo pejat auti (i kako ki kombi), ma avion je neč fantastično. Rada bin šla va Grčku, va Meksiko, va Peru i Boliviju, va Irsku... (pogajate – z avionon!)
• Najdraži regal?
  Bilo ča vezano za moje zanimanje – endlerica, klamerica, razglednica, samo da ni kakova sprava za muč... vježbanje, al kakov drugi «skupljač praha» - prah ne volin trt pa takove stvari brzo fine va konobu.
• Kade se vidin za deset let?
  Kod delavac va struke s puno vremena za decu, auti, kanat, maškare i pasi.
• Iman tremu?
  Tremu san zadnji put imela prej prvega nastupa – imela san sedan let i sopla san armuniku na priredbe za kraj leta va Dome mladeh. Pozdrav tete Branke!
• Ča delan va slobodno vreme kad ne kantan va klape?
  Onda kantan dok preslagujen ormari, dekoriran, lunjan po šumah i gorah, zmišjan svinjarije za dragi judi, šijen (boršetice ke nose moje ženske zašila san noć prej puta va Kaštela – ni da se hvalin). Jedino va Pusnen odbore Zametskeh maškar i zvončari ne kantan, ma potla sastanka rada zatancan potresuju.